條氣唔順
今年五月，梁思浩因為拒簽不跳槽協議被港台炒魷，被叮出做了十七年清談節目《瘋Show快活人》後，最終落實以一千五百萬三年，簽約大班鄭經翰的雄濤電台，並自組新拍檔，開咪跟舊主對撼。
先禮後兵，梁思浩早前送了三個包括數碼收音機的聖誕禮物籃給舊老闆，不過小器港台不單遲遲唔肯接收，之後更索性將禮物掟入垃圾筒，唔拆唔睇。
落令唔准收
前週五（十二月二日）上午，梁思浩託速遞送了三個聖誕禮物籃到港台，給廣播處長以及有份落令炒他的兩大高層周偉才及馮偉棠；見送禮人是梁思浩，接待處職員狂撥電話搵人接收，不過遲遲冇人回覆。擾攘一輪，職員收order代表簽收，但對方卻隨手將禮物當垃圾，放在垃圾筒旁。三個禮物籃一直無被安排送上辦公室，接待處女職員更此地無銀，要求記者影相時唔好影埋垃圾筒。
港台將禮物當垃圾並非第一次，梁思浩離開港台翌日也曾送生果籃，向合作多年的同事表示多謝，由最高層到洗碗阿嬸都有份，不過當日港台下令，全部人唔准收，更即時將生果當垃圾，統統放入垃圾筒。
「好多港台同事都覺得唔好意思，因為我哋同思浩根本就冇唔啱，唔明點解唔可以收？況且好浪費食物，我哋之後都有打電話多謝思浩，佢都算大方，明知俾人玩都做到咁足。其實港台都唔知做乜要搞成咁，有咁大嚿錢，冇理由唔走啫，過檔都係人之常情。」港台同事說。被指小器，港台繼續話之你，在上月中舉行的三十周年大型派對，廣邀新舊同事出席，就連有份做過客席主持的藝人陳彥行、已離職多年的前DJ Kawaii都獲邀請，唯獨連續多年成為最受歡迎節目主持人的梁思浩無份。
禮物連單據
務求令舊同事收得安心，梁思浩今次送的聖誕禮物籃內，更附有每份禮物收據，加起來約值四百八十元，絕不超過港台員工收禮不多於五百元的價錢上限守則，不過依然白費心機。聖誕禮物當垃圾，梁思浩有曬心理準備。「如果真係咁，我覺得好唔環保，因為唔要嘅禮物可以轉贈俾其他人。（出年仲會唔會送？）其實我每一年都會送聖誕禮物俾合作過嘅電視台同電台，好似陳志雲、珍姐（曾勵珍）同樂易玲都有送，出年就真係唔知。」
港台混賬
已成立30年的香港電台第二台，近年是非不斷，甚至被形容為「爛攤子」，聽眾質疑港台，甚至有網民在社交網站設立「我要投訴香港電台的群組」，以示不滿。
批評即炒
本月初，上任唔夠三個月的香港電台新任廣播處長鄧忍光，以新節目調動為由將敢言的吳志森及周融撤任主持，激起眾怒。早前他出席港台公眾諮詢會，被聽眾抨擊未熟習電台運作即倉卒向「唔啱聽」的主持人開刀，有用人唯親之嫌。
出爾反爾
年前無綫與四大唱片公司發生版稅風波，四大歌手在無綫勁歌總選統統食白果，令四台聯頒的傳媒大獎失去原意，港台因而提議停辦一年，但其後出爾反爾，在《十大中文金曲頒獎禮》上自設「傳媒大獎」，因而引起東亞及英皇不滿，甚至勒令旗下歌手將全體缺席《十大頒獎禮》，以示杯葛。 ####
收啦，份禮唔超過$500蚊㗎。（設計對白）
港台職員打電話搵人收禮物，最後冇人理兼放在垃圾筒旁。
聖誕禮物籃內有數碼收音機。
跟譚凱琪（右一），合作做有線《怪談》主持，早前在殯儀館內錄影，栢芝媽突然出現探班。
由梁榮忠頂替他做節目，二人七月在書展碰面，梁榮忠特登搵梁思浩簽名，被指抽水搏出位。
被指中了三次六合彩以及身家過億的梁思浩，除做電台外，又開糖水鋪，早前他就攞住十二萬幾Hermés巡鋪。
梁思浩跟江美儀、莊思敏及Kawaii等新拍檔合作的新節目《大家真風騷》擺明跟舊節目對着幹。
港台早前舉行30周年派對，廣邀新舊DJ，當日鄭丹瑞、林珊珊以及蔡楓華等舊主持人都有出席影大合照。
鄧忍光
1136期
